ತಿರುವರಂಗಪ್ಪೆರುಮಾಳ್ ಅರಯರ್

ಶ್ರೀ: ಶ್ರೀಮತೇ ಶಠಗೋಪಾಯ ನಮ: ಶ್ರೀಮತೇ ರಾಮಾನುಜಾಯ ನಮ: ಶ್ರೀಮದ್ ವರವರಮುನಯೇ ನಮ: ಶ್ರೀ ವಾನಾಚಲ ಮಹಾಮುನಯೇ ನಮ:

ತಿರುವರಂಗಪ್ಪೆರುಮಾಳ್ ಅರಯರ್ – ಶ್ರೀರಂಗಮ್

ತಿರುನಕ್ಷತ್ರಮ್ : ವೈಕಾಶಿ, ಕೇಟ್ಟೈ
ಅವತಾರ ಸ್ಥಳ :  ಶ್ರೀರಂಗಮ್
ಆಚಾರ್ಯನ್:  ಮಣಕ್ಕಾಲ್ ನಂಬಿ, ಆಳವಂದಾರ್

ಶಿಷ್ಯರು: ಎಂಪೆರುಮಾನಾರ್ (ಗ್ರಂಥ ಕಾಲಕ್ಷೇಪ ಶಿಷ್ಯ)

ಪರಮಪದಕ್ಕೆ ಸೇರಿದ ಸ್ಥಳ:   ಶ್ರೀರಂಗಮ್

ತಿರುವರಂಗಪ್ಪೆರುಮಾಳ್ ಅರಯರ್ ಅವರು ಆಳವಂದಾರ್ ಅವರ ಪುತ್ರರು ಮತ್ತು ಆಳವಂದಾರ್ ಅವರ ಪ್ರಮುಖ ಶಿಷ್ಯರಲ್ಲೊಬ್ಬರಾಗಿದ್ದರು.

ಅರಯರ್ ಅವರು ಸಂಗೀತ, ನೃತ್ಯ ಮತ್ತು ನಾಟಕಗಳಲ್ಲಿ ಪಾರಂಗತರಾಗಿದ್ದರು. ಒಮ್ಮೆ ಅಧ್ಯಯನ ಉತ್ಸವದಲ್ಲಿ, ನಂಪೆರುಮಾಳ್ (ಶ್ರೀರಂಗನಾಥನ ಉತ್ಸವ ಮೂರ್ತಿ) ಸಮ್ಮುಖದಲ್ಲಿ ಅರಯರ್ ಸೇವೆಯನ್ನು ಮಾಡುವಾಗ, ಅವರು ತಿರುವಾಯ್ಮೊಳಿಯ (10.2.8) “ಕೆಡುಮಿಡರ್” ಪದಿಗವನ್ನು ಹಾಡುತ್ತಿದ್ದರು. ಆ ಪದಿಗದಲ್ಲಿ, ಸಭೆಯ ನಾಯಕರಾದ ಆಳವಂದಾರ್ ಅವರ ಕಡೆ ನೋಡುತ್ತಾ, ಅವರು “ನಡಮಿನೋ ನಮರ್ಗಳುಳ್ಳೀರ್ ನಾಮುಮಕ್ಕು ಅರಿಯ ಚೋನ್ನೋಮ್” ಎಂದು ಹಾಡಿದರು – ಅರ್ಥಾತ್ “ಒಹ್ ! ನನ್ನ ಪ್ರಿಯ ಭಕ್ತರೇ, ಈಗ ತಿರುವನಂತಪುರಕ್ಕೆ ಹೊರಡಿ”. ಆಳವಂದಾರ್ ಅವರು ಅದನ್ನು ಸ್ವತಃ ನಂಪೆರುಮಾಳ್ ಆದೇಶವೆಂದು ಸ್ವೀಕರಿಸಿ, ಅನಂತಶಯನ ಭಗವಂತನಿಗೆ ಮಂಗಳಾಶಾಸನವನ್ನು ಮಾಡಲು ತಿರುವನಂತಪುರಕ್ಕೆ ಹೊರಡುತ್ತಾರೆ.

ಆಳವಂದಾರ್ ಅವರ ಅಂತಿಮ ಕಾಲದ ನುಡಿಗಳಲ್ಲಿ ಅರಯರ್ ಅವರಿಗೆ ತಿರುಪ್ಪಾಣಾಳ್ವಾರ್ ಅವರೊಂದಿಗೆ ಅತಿಯಾದ ನಂಟಿತ್ತೆಂದು ಸ್ಪಷ್ಟವಾಗುತ್ತದೆ. ಅರಯರ್ ಅವರಿಗೆ ಪೆರಿಯ ಪೆರುಮಾಳ್ ಮತ್ತು ತಿರುಪ್ಪಾಣಾಳ್ವಾರರಲ್ಲಿ ಇರುವ ಅನನ್ಯ ಭಕ್ತಿಯಿಂದಾಗಿ ಆಳವಂದಾರ್ ಅವರು ತಮ್ಮ ಅಂತಿಮ ದಿನಗಳಲ್ಲಿ ಪ್ರತಿಯೊಬ್ಬರೂ ತಿರುವರಂಗಪ್ಪೆರುಮಾಳ್ ಅರಯರ್ ಅವರೊಂದಿಗೆ ಬಹುವಾದ ಬಾಂಧವ್ಯವನ್ನು ಹೊಂದಿರಬೇಕೆಂದು ಸ್ಪಷ್ಟಪಡಿಸುತ್ತಾರೆ. ಅರಯರ್ ಅವರ ಹಿರಿಮೆ ಎಷ್ಟೆಂದರೆ ಅವರನ್ನು ಸ್ವತಃ ಆಳವಂದಾರ್ ಅವರೇ ಸಾರ್ವಜನಿಕವಾಗಿ ಪ್ರಶಂಸಿಸಿದ್ದಾರೆ.

ಅರಯರ್ ಅವರು ರಾಮಾನುಜರನ್ನು ಶ್ರೀರಂಗಕ್ಕೆ ಕರೆತರುವಲ್ಲಿ ಬಹು ಮುಖ್ಯ ಪಾತ್ರ ವಹಿಸಿದ್ದರು. ಆಳವಂದಾರ್ ಅವರ ಕಾಲದ ನಂತರ ಮತ್ತು ಎಂಬೆರುಮಾನಾರರು ಸಂನ್ಯಾಸಾಶ್ರಮವನ್ನು ಸ್ವೀಕರಿಸಿದ ನಂತರ, ಎಲ್ಲ ಶ್ರೀವೈಷ್ಣವರೂ ರಾಮಾನುಜರನ್ನು ಶ್ರೀರಂಗಕ್ಕೆ ಕರೆತಂದು ಅಲ್ಲಿಯೇ ಶಾಶ್ವತವಾಗಿ ನೆಲೆಸುವಂತೆ ಮಾಡಲು  ನಂಪೆರುಮಾಳ್ (ಶ್ರೀರಂಗನಾಥನ ಉತ್ಸವ ಮೂರ್ತಿ) ಅವರಲ್ಲಿ ಪ್ರಾರ್ಥಿಸುತ್ತಾರೆ. ಆ ಕೂಡಲೇ ಪೆರಿಯ ಪೆರುಮಾಳ್ (ಶ್ರೀರಂಗನಾಥನ ಮೂಲ ಮೂರ್ತಿ) ರಾಮಾನುಜರನ್ನು ಶ್ರೀರಂಗಕ್ಕೆ ಕಳುಹಿಸುವಂತೆ ದೇವ ಪೆರುಮಾಳ್ (ಕಾಂಚೀಪುರಮ್ ವರದರಾಜರು) ಅವರಿಗೆ ವಿಜ್ಞಾಪನೆಯನ್ನು ಕಳುಹಿಸುತ್ತಾರೆ. ಆದರೆ ಪೇರರುಳಾಳನ್ (ವರದರಾಜರು) ಅವರು ತಮ್ಮ ಹೃದಯಕ್ಕೆ ಅತಿ ಪ್ರಿಯರಾದ ರಾಮಾನುಜರನ್ನು ಕಳುಹಿಸಲಾಗುವುದಿಲ್ಲವೆಂದು ತಿಳಿಸುತ್ತಾರೆ. ಆಗ ಶ್ರೀರಂಗನಾಥರು ರಾಮಾನುಜರನ್ನು ಶ್ರೀರಂಗಕ್ಕೆ ಕರೆತರಲು ಒಂದು ಯೋಜನೆಯನ್ನು ರೂಪಿಸುತ್ತಾರೆ. ಅವರು ಅರಯರ್ ಅವರಿಗೆ ಹೇಳುತ್ತಾರೆ “ವರದರಾಜರು ಸಂಗೀತ ಮತ್ತು ಸ್ತೋತ್ರವನ್ನು ಬಹಳವಾಗಿ ಇಷ್ಟಪಡುತ್ತಾರೆ ಮತ್ತು ಅವರನ್ನು  ಸ್ತೋತ್ರಗಳಿಂದ ಮೆಚ್ಚಿಸಿದವರಿಗೆ ಏನು ಬೇಕಾದರೂ ಕೊಡುತ್ತಾರೆ”. ಆದ್ದರಿಂದ ವರದರಾಜರನ್ನು ಸ್ತೋತ್ರಗಳಿಂದ ತೃಪ್ತಿಪಡಿಸಿ ಏನು ಬೇಕಾದರೂ ಕೇಳಿಕೊಳ್ಳುವಂತೆ ಹೇಳಿದಾಗ, ತಮಗೆ ರಾಮಾನುಜರು ಬೇಕೆಂದು ಕೇಳಬೇಕೆಂದು ಅರಯರ್ ಅವರಿಗೆ ಶ್ರೀರಂಗನಾಥರು ಸೂಚಿಸುತ್ತಾರೆ.

ಒಮ್ಮೆ ರಾಮಾನುಜರು ಸಿದ್ಧಪಡಿಸಿದ ಅರಿಶಿಣ ಲೇಪನವು ಅರಯರ್ ಅವರಿಗೆ ತೃಪ್ತಿದಾಯಕವಾಗಲಿಲ್ಲ – ಅರಯರ್ ಅವರ ಅತೃಪ್ತಿಯನ್ನು ಅವರ ಮುಖವನ್ನು ನೋಡಿಯೇ ರಾಮಾನುಜರು ಅರಿಯುತ್ತಾರೆ. ಆನಂತರ ಮತ್ತೊಂದು ಬಾರಿ ಅರಿಶಿಣ ಲೇಪನವನ್ನು ತಯಾರಿಸುತ್ತಾರೆ ಮತ್ತು ಅದು ಅರಯರ್ ಅವರ ಹೃದಯಕ್ಕೆ ಎಷ್ಟು ತೃಪ್ತಿದಾಯಕವಾಗಿತ್ತೆಂದರೆ ಅವರು ಅಂತಿಮ ಉಪಾಯ ಮತ್ತು ಅಂತಿಮ ಧ್ಯೇಯಗಳಾದ ಆಚಾರ್ಯ ನಿಷ್ಠೆಯನ್ನು ಬೋಧಿಸುತ್ತಾರೆ. ಅವರು ವಿವರಿಸುತ್ತಾರೆ – “ನಾವು ಯಾವಾಗಲೂ ಕ್ಷೀರಾಬ್ಧಿಯಲ್ಲಿ ಪವಡಿಸಿರುವ ಆ ಭಗವಂತನೇ ಆಚಾರ್ಯರ ರೂಪದಲ್ಲಿರುವನೆಂದು ಪರಿಗಣಿಸಬೇಕು”. ಚರಮೋಪಾಯದ ವಿವರಗಳನ್ನು ನಾವು ಈಗಾಗಲೇ ಇಲ್ಲಿ ನೋಡಿದ್ದೇವೆ – https://granthams.koyil.org/charamopaya-nirnayam-english/ .

ಅರಯರ್ ಅವರ ಹಿರಿಮೆಯನ್ನು ಅನೇಕ ಐತಿಹ್ಯಗಳಲ್ಲಿ ತೋರ್ಪಡಿಸಲಾಗಿದೆ. ಅವುಗಳಲ್ಲಿ ಒಂದೆರಡನ್ನು ಇಲ್ಲಿ ನೋಡೋಣ:

– 1.5.11 ರ ಈಡು ವ್ಯಾಖ್ಯಾನದಲ್ಲಿ, “ಪಾಲೇ ತಮಿಳರ್ ಇಶೈಕಾರರ್” ಎಂಬುದನ್ನು ವಿವರಿಸುವಾಗ – ಇಶೈಕಾರರ್ ಎಂದರೆ ಸಂಗೀತ ಪ್ರವೀಣ ಎಂದರ್ಥ, ಆದರೆ ನಂಪಿಳ್ಳೈ ಅವರು ಆಳ್ವಾನ್ ಅವರನ್ನು ಉಲ್ಲೇಖಿಸಿ ಇಶೈಕಾರರ್ ಎಂದರೆ ತಿರುವರಂಗಪ್ಪೆರುಮಾಳ್ ಅರಯರ್ ಎಂಬರ್ಥದಲ್ಲಿ ಹೇಳಿದ್ದಾರೆ.

– 3.3.1 ರ ಈಡು ವ್ಯಾಖ್ಯಾನದಲ್ಲಿ, ನಂಪಿಳ್ಳೈ ಅವರು ವಿವರಿಸುತ್ತಾರೆ – “ಒಳಿವಿಲ್ ಕಾಲಮೆಲ್ಲಾಮ್” ಎಂಬುದನ್ನು ಅರಯರ್ ಅವರು ಹಾಡಲು ಪ್ರಾರಂಭಿಸಿದರೆ ಭಾವಪರವಶರಾಗಿ ಕಾಲಮೆಲ್ಲಾಮ್, ಕಾಲಮೆಲ್ಲಾಮ್ ಎಂದೇ ಹಾಡುತ್ತಿರುತ್ತಾರೆ ಮತ್ತು ಮುಂದುವರಿಸದೆ ಅಲ್ಲಿಗೇ ಪೂರ್ಣಗೊಳಿಸುತ್ತಾರೆ. ಈ ಪದಿಗದಲ್ಲಿ ಆಳ್ವಾರರು ನಿರಂತರ /ಅನಿರ್ಬಂಧಿತ /ಶುದ್ಧವಾದ ಕೈಂಕರ್ಯವನ್ನು ದಯಪಾಲಿಸುವಂತೆ ಶ್ರೀವೇಂಕಟೇಶ್ವರನಲ್ಲಿ ವಿನಂತಿಸಿಕೊಳ್ಳುತ್ತಾರೆ ಮತ್ತು ಈ ಪದಿಗವು ದ್ವಯ ಮಹಾಮಂತ್ರದ (ಕೈಂಕರ್ಯ ಪ್ರಾರ್ಥನೆ) ಎರಡನೇ ಸಾಲಿನ ಅರ್ಥವೆಂದು ಗುರುತಿಸಲ್ಪಟ್ಟಿದೆ.

ನಮಗೆ ಭಗವಂತ ಮತ್ತು ಆಚಾರ್ಯರಲ್ಲಿ ಇದೆ ರೀತಿಯ ಸಂಬಂಧವನ್ನು ಅನುಗ್ರಹಿಸುವಂತೆ ಅರಯರ್ ಅವರ ಚರಣಾರವಿಂದಗಳಲ್ಲಿ ಪ್ರಾರ್ಥಿಸೋಣ.

ತಿರುವರಂಗಪ್ಪೆರುಮಾಳ್ ಅರಯರ್ ಅವರ ತನಿಯನ್:

ಶ್ರೀರಾಮಮಿಶ್ರ ಪದಪಂಕಜ ಸಂಚರೀಕಂ ಶ್ರೀ ಯಾಮುನಾರ್ಯ ವರಪುತ್ರಂ ಅಹಂ ಗುಣಾಭ್ಯಮ್

ಶ್ರೀರಂಗರಾಜ ಕರುಣಾ ಪರಿಣಾಮದತ್ತಮ್ ಶ್ರೀಭಾಷ್ಯಕಾರ ಶರಣಂ ವರರಂಗಮೀಡೇ 

ಅರ್ಥ:

ಮಣಕ್ಕಾಲ್ ನಂಬಿಗಳ ಪಾದಾರವಿಂದಗಳಲ್ಲಿ ಒಂದು ದುಂಬಿಯಂತೆ ಇದ್ದು, ಯಾಮುನಾಚಾರ್ಯರ ದಿವ್ಯಪುತ್ರರಾದ, ಮಂಗಳಕರವಾದ ಗುಣಗಳಿಂದ ಕೂಡಿದ, ಶ್ರೀರಂಗನಾಥನ ದಿವ್ಯಾನುಗ್ರಹದಿಂದ ಜನಿಸಿದ, ಶ್ರೀಭಾಷ್ಯಕಾರರನ್ನು ತಮ್ಮ ಶಿಷ್ಯರನ್ನಾಗಿ ಹೊಂದಿದ, ತಿರುವರಂಗಪ್ಪೆರುಮಾಳ್ ಅರಯರ್ ಅವರನ್ನು ನಾನು ಸ್ತುತಿಸುತ್ತೇನೆ.

ಅಡಿಯೇನ್ ಪಾರ್ಥಸಾರಥಿ ರಾಮಾನುಜ ದಾಸನ್ 

ಮೂಲ: http://acharyas.koyil.org/index.php/2013/01/12/thiruvarangapperumal-arayar-english/

ಪ್ರಮೇಯಮ್ (ಗುರಿ) – https://koyil.org
ಪ್ರಮಾಣಮ್ (ಗ್ರಂಥಮ್) – https://granthams.koyil.org
ಪ್ರಮಾಥಾ (ಆಚಾರ್ಯ) – https://acharyas.koyil.org
ಶ್ರೀವೈಷ್ಣವ ಶಿಕ್ಷಣ/ಮಕ್ಕಳ ತಾಣ – https://pillai.koyil.org